Gonyanhatu

Muchidzidzo chePimanzvimbo, gonyanhatu chiumbwa chine mativi matatu nemagonya matatu. Gonyanhatu chiumbwa chiri pamupanda wegonyazhinji. Gonyanhatu rine mikwava A, B, C rinonyorwa sezvizvi, ΔABC.

Mhando dzegonyanhatu

Muchikamu chino tichataura pamusoro pemarudzi egonyanhatu; mhando dzegonyanhatu dzinotumidzwa mazita zvichienderana nekupimwa kwemativi uye magonya ari pakati paro.

Kune gonyanhatu tsazakose (equilateral triangle) - iri rine mativi ose akaenza uye gonya nhatu dzose dzakaenzana.

Kune gonyanhatu mutseyekwa (scalene triangle) - iri rine mativi ose ane nhambwe dzakasiyana uye gonya nhatu dzose dzakasiyana. Hazvinei gonyanhatu mutseyekwa agara nedivi ripi anotaridzika seanorerekera (kana kuwandira) kune rimwe divi nguva dzose.

Kune gonyanhatu tsazamaviri (isosceles triangle) - iri rine mativi maviri akaenzana, negonya mbiri dzakaenzana.

Kunoitawo gonyanhatu yemutwi (right-angled triangle) - iyi ine mativi maviri anosvika pamukwava une gonya re 90^o.

Nharaunda yeGonyanhatu

Nharaunda yegonyanhatu runonyorwa netsazaniso inoti:

Nharaunda = 1/2(b.h)

Patsazaniso iri, b, anomirira hwaro hwegonyanhatu; h achimirira hudzamu. Panotsvakwa ruvanze, tinogona kusarudza divi ripi zvaro kuti rive hwaro. Kana tadaro, hudzamu hunenge hwave nhambwe yemutwi unobva pagonya rakatarisana nehwaro uchinobata pahwaro hwegonyanhatu.

Govano dzePimagonyanhatu

Ichi chidzidzo chononzi trigonometric ratio kuEnglish. Chidzidzo chino chinotaura pamusoro pehukama huripo pakati penhambwe dziri pamativi nemagonya egonyanhatu. Chikamu ichi tinoshanda negonyanhatu yemutwi tichidzidza nezve govano dzinoti tangent, sine uye cosine. Govano idzi dzinoshandiswa kuti tizive mativi uye magonya ane hukuru hunenge husinga zivikanwe.

Kuti tipinde muchidzidzo cheGovano dzePimagonyanhatu tinotanga tadudza mazita anopiwa kumativi egonyanhatu. Mativi matatu anopiwa mazita zvichibva pakuti tiri kushanda negonya ripi regonyanhatu.

• Divi rakabatana negonya ratiri kushanda naro rinonzi hwaro (adjacent kuEnglish),

• Divi rakatarisana negonya ratiri kushanda naro rinonzi darisanwa (opposite kuEnglish) ; iri divi rakaita mutwi nehwaro.

• Divi guru rine nhambwe yakareba kupfura mamwe rinonzi muzendami (hypotenuse) nokuti rinoita sokunge rakazendamiswa rakatsigirwa kuhwaro nedarisanwa.

Sine yegonya igovano yenhambwe dzedarisanwa nemuzendami. Sine ine tsazaniso inoti:

Sine = darisanwa/muzendami

Cosine yegonya igovano yenhambwe dzehwaro nemuzendami. Cosine ine tsazaniso inoti:

Cosine = hwaro/muzendami

Tangent yegonya igovano yenhambwe dzedarisanwa nehwaro. Tangent ine tsazaniso inoti:

Tangent = darisanwa/hwaro