Kuketa (Kuona)

Shoko rokuti kuketa (know, see, perceive, skillful) ishoko rechimanje-manje rakatekeshera rinotaura zvizhinji zvinosanganisira: kuva noruzivo, kuona, kuyeuka chawakamboona, kuva nenjere, kuva nehunyanzvi, kutarisa, kupatsanura, kuronga zvichingodaro. Izwi iri rinoshandiswa pakawanda zvokuti chiri nyore kutopa muenzaniso weparinoshandiswa kuti tibate kuti rinorevei.

• Mupfana Tonde anoketa bhora manje. Apa kutaura kuva nehunyanzvi hwebhora - skillfull.

• Chipo anoketa Science zvinoshamisa - kureva kuti ane njere dzinokasira kubata zvinodzidziswa - intelligent.

• Momz yaigara paDen apa unoiketa here, yakaenda kuSouth Africa? Apa kureva kuziva munhu - to know.

• Muchinda ane Land Rover iyo wamuketa here, anobva kumaraini kwedu? Apa kuyeuka munhu wawakamboona kare - to recognize.

• Shingi waiketa here yanga ichitaurwa namudhara? Apa kureva kubata musoro wenyaya kuti inorevei - to perceive.

• Keta bhachi rakapfekwa nemukomana uyo? - apa kureva kuti tarisa bhachi - to look, see.

Nemamwe matauriro anoreva zvakasiyana, kuketa zvinoreva kupatsanura nokuronga zvinhu kuisa mumapoka anoda kunzi avepo. Muenzaniso wekushanda kweshoko iri ndeaya:

• Vanochera ngoda vanoda kuketa matombo acho maererano nehukoshi, kukura kwawo, ruvara, husvinu, zvichingodaro.

• Post Office inovavarira kuketa matsamba zvichienderana nokuti dziri kuenda kupi.

Kuwumbiridza Mashoko

Tikanatso cherechedza tinoona shoko rokuti kuketa rinobata zvinosanganisa: kuva noruzivo, kuona, kuyeuka chawakamboona, kuva nenjere, kuva nehunyanzvi, kutarisa, kupatsanura, kuronga zvichingodaro. Zvinotaurwa neshoko rokuti kuketa zvinoda kutodza zvinotaura chivakashure -logy cheEnglish chinoreva study or knowledge. Zvinganaka sei kuti tikwanise kuturikira mazwi ari kuEnglish ane chivakashure ichochi.

• Sokuti panonzi Geology, isu toti Ketanyika; nyanzvi yacho Geologist yonzizve Chiketanyika.

• Tichitevedza kutaura kumwechete tinogona kuti Zoology yonzi Ketamhuka, nyanzvi yacho Zoologist yonzizve Chiketamhuka.

• Chidzidzo Gynaecology chinenge chonzi Ketamukadzi, chiremba wevakadzi gynaecologist toti Chiketamukadzi.